Hazırda ölkəmizdə avtomobil ehtiyat hissələrinin vahid standartı olmadığından bu sahədə boşluq var. Bəzi sahibkarlar bu boşluğu doldurmaq əvəzinə, yaranan vəziyyəti öz xeyirlərinə çevirərək, bundan istifadə etməyə çalışırlar. Hətta Cənab Prezidentin sahibkarlara olan qayğısı, diqqətindən sui-istifadə etməyə belə çəkinmirlər. Saytımıza daxil olan çoxsaylı şikayətləri nəzərə alaraq, yeni bir araşdırma aparmaq qərarına gəldik. Bu dəfəki araşdırmamız öz şou xarakterli reklamları ilə insanları cəlb etməyə çalışan, “müştəri məmnunluğu, bizim sevincimizdir” devizini qarşısına məqsəd qoyan, illərdir dayanmadan və yorulmadan insanları aldadaraq “irəliyə doğru addımlayan” "Ştutqart” mağazalar şəbəkəsi haqqındadır. 2004-cü ildə yaradılmış Ştutqart mağazası müxtəlif növ avtomobil ehtiyat hissələrini dünya ölkələrindən Azərbaycana gətirərək topdan və pərakəndə satışını həyata keçirməklə məşğuldur. "Ştutqart”ın Mərkəzi, Mikrorayon, Yasamal, Biləcəri, Əhmədli, Bakıxanov, Masallı, Lənkəran və s filialları mövcuddur. Cəmiyyətdə “Ştutqart” mağazalar şəbəkəsinin millət vəkili Nəriman Əliyevə məxsus olduğunu bilməyən yoxdur. Sadəcə olaraq rəsmi sənədlərdə Nəriman Əliyevin bacısı oğlu Əfqan Abdullayevin adı qeyd olunur. Adıçəkilən şirkətin müştərilərə təqdim etdiyi məhsulların böyük bir qismi olduqca keyfiyyətsizdir. RİA24.az-a daxil olan informasiyada deyilir ki, sözügedən şirkət son zamanlar hətta qiymətləri belə ciddi şəkildə qaldırıb.

Qısa bir məlumat qeyd edək : “ Ehtiyat hissələri 3 qismdə istehsal olunur: orijinal, zavodun lisenziyası əsasında fəaliyyət göstərən müəssisələr və qeyri-qanuni yolla istehsal edilən ehtiyat hissələri. Lakin son dövrlər 3-cü qism ehtiyat hissələri bazarı ələ alıb ki, bunlar da, əsasən, Çin istehsalıdır. Malların ucuzluğu alıcı cəlb etsə də, keyfiyyətin aşağı olması sonradan ağır fəsadlara, bədbəxt hadisələrə gətirib çıxarır. “

Araşdırmamız nəticəsində məlum oldu ki , «Ştutqart» mağazalar şəbəkəsində müştərilərə əsasən , Çin istehsalı olan avto ehtiyat hissələri “ orjinal “ məhsul adı ilə təqdim olunur. Bu isə ağır nəticələrə gətirib çıxarda bilər. İnsanların idarə etdiyi maşının ehtiyat hissələrinin keyfiyyətsizliyi birbaşa onları ölümə sürükləmək deməkdir. Dövlət məmuru olan bir sahibkarın bu cür əməllərlə insanların həyatları ilə oynayaraq, onları dövlətdən narazı salacaq addım atması Cənab Prezidentin sahibkarlığın inkişafı üçün sahibkarlara diqqət, qayğı siyasətinə kölgə sala bilər. Bu isə bir dövlət məmuru üçün yolverilməz olmalıdır .

Bundan əlavə, RİA24.az avtomobil ustaları arasında da qısa sorğu keçirdi. Sorğu zamanı məlum oldu ki,«Ştutqart» mağazalar şəbəkəsinin istismara yararsız olan bu cür ehtiyat hissələri tez bir zamanda sıradan çıxır. Deyilənlərə görə, deputat Nəriman Əliyevin sahibi olduğu «Ştutqart»ın satıcıları satdıqları məhsullara təminat, zəmanət vermirlər. Halbuki satıcılar tərəfindən malın təminatı olmalı və sənəd formasında göstərilməlidir.

Adıçəkilən mağazanın mərkəzi ofisində və filiallarında belə hallar da olur ki, keyfiyyətsiz ehtiyat hissələri orijinal bağlamalarda satılır. Həmin ehtiyat hissələri isə Çində ən keyfiyyətsiz materiallardan hazırlanır, avtomobilə qoyulan zaman isə müəyyən fəsadlara səbəb olur. Məsələnin maraqlı tərəfi ondadır ki, bu cür ehtiyat hissələrinə baxış zamanı bu işdə peşəkar olmayan insan heç bir fərq görməyəcək. Lakin mütəxəssislər, avtomobil ustaları bildirirlər ki, «Ştutqart»ın müştərilərə təqdim etdiyi qeyri-orijinal ehtiyat hissələri tez bir zamanda sıradan çıxır, üstəlik müəyyən nasazlıqlara səbəb olur

Bütün bunlar bir daha onu təsdiqləyir ki, deputat Nəriman Əliyevin sahibi olduğu «Ştutqart» asan yolla daha çox gəlir əldə etmək naminə müxtəlif üsullarlarla müştərilərə kələk gəlir».

Məsələ ilə bağlı araşdırmamız davam edir. Qarşı tərəfin də mövqeyini dinləməyə hazırıq.
RIA24.AZ