Keçmiş icra başçısı, hazırki deputat Asif Əsgərovun “çətiri” altında olan şirkət yaşıllığa qənim kəsilib
Paytaxtın Nəsimi rayonunda 20 Yanvar küçəsi ilə Cavadxan küçəsinin kəsişməsində tikintisi başa çatmaq üzrə olan on altı mərtəbəli yaşayış binasının sifarişçisi olan “Garant İnşaat” Mənzil Tikinti Kooperativinin rəhbərliyi deyəsən layihə üzrə planlaşdırılan ölçülərindən çox kənara çıxmaq tamahına düşüb.
MTK rəhbərliyi binanın həyətindən əvvəldən nəzərdə tutulduğu kimi, təkcə 20 Yanvar küçəsinə çıxışının olması ilə kifayətlənməyərək, guya gələcək sakinlərinin məmnunluğunu təmin etmək və əlbəttə ki, mənzillərin qiymətini artırmaq üçün Cavadxan küçəsinə də yol açmaq qərarına gəlib. Hazırda bu məqsəd naminə əraziyə buldozer və başqa texnika cəlb olunaraq sürətli iş aparılır. Acınacaqlı haldır ki, iş görülərkən ərazidəki yaşıl ağaclar kökündən qoparılır.
Razılaşaq ki, ekologiyanın saflaşmasına xidmət edən COP29 kimi mötəbər tədbirə ev sahibliyi etdiyimiz, “yaşıl enerji”yə keçidimizlə öyündüyümüz, neft istehsalçısı olduğumuz üçün Qərbin şantajlarına tuş gəldiyimiz indiki məqamda belə neqativ hallar heç də xeyrimizə işləmir və bizim barəmizdə qınaqlara layiq olduğumuz təsəvvürü yaradır.
Heç cür inanılası deyil ki, “Garant İnşaat” MTK bunca qanunsuz əməllərindən Nəsimi Rayon İcra Hakimiyyətində xəbərsizdirlər. Çünki sözügedən “yaşıl soyqırım” barədə hələ bu ilin avqust ayında sosial şəbəkədə narazılıq ifadə edən məlumatlar yayılmışdı. Qeyd olunurdu ki, binadan əvvəl həmin yerdə kafe-restoran olub və yaşıllığın seyrəlməsinə hələ o vaxtdan başlanılıbmış. O da bildirilirdi ki, adı çəkilən innşaat şirkəti Nəsimi RİH-nin sabiq başçısı Asif Əsgərovun “çətiri” altındadır. Asif Əsgərov da 2024-cü ilin sentyabrı ayında keçirilən parlament seçkilərində deputat mandatı və toxunulmazlığı qazanmaqla keçmişdə göz yumduğu qanunsuzluqlara görə cavab vermək məsuliyyətindən özünü sığortalamağı bacardı. Ancaq cəmiyyət arasında nüfuzu heç də azalmadı, bəlkə də artdı.
O vaxt hətta saytlardan biri ağacların kəsilməsi ilə bağlı Ekologiya və Təbii Sərvətlər Nazirliyinə müraciət etmiş, Dövlət Ekoloji Təhlükəsizlik Xidmətinin rəsmisi Vaqif Cavadovdan cavab da almışdı: “Nəsimi rayonu, 20 Yanvar və Cavadxan küçələrinin kəsişməsində ağacların kəsilməsi ilə bağlı quruma daxil olan şikayət araşdırılıb. Araşdırma zamanı ağacların sözügedən ərazidə çoxmərtəbəli binanın tikintisi məqsədilə qazıntı işləri aparan "Garant İnşaat” MTK tərəfindən kəsildiyi və təbiətə 6600 manat məbləğində ziyan dəydiyi müəyyən edilib. Təbiətə dəymiş ziyanın məbləği cinayət tərkibi yaratdığından toplanmış sənədlər Baş Prokurorluğa göndərilib”.
Həmişəki ssenaridir, yalnız şikayət olunduğu halda hərəkətə keçən nəzarətedici orqan vurulmuş ziyanı nəyinsə müqabilində qəsdən aşağı göstərir ki, təqsirkar cinayət məsuliyyətinə deyil, yalnız inzibati məsuliyyətə cəlb olunsun. O da sonra bildiyini edir.
Nyus.Az
