İçərişəhərdə yüzlərlə su quyusunun bərpası böyük iqtisadi gəlir vəd edir

Təxminən yetmiş il qabaq, 20-ci əsrin 50-ci illərində Bakınının tarixi İçərişəhərində düşüncəsiz şəkildə doldurulmuş yüzlərlə su quyusunun yenidən bərpası paytaxt iqtisadiyyatına böyük fayda verə bilər. Bu quyuların bərpası şəhərdə həm də yerli su qaynaqlarının payını artırar.

Nyus.Az REAL TV-yə istinadən xəbər verir ki, digər Cənubi Qafqaz paytaxtlarından fərqli olaraq Bakının mərkəzində hazırda yerli su qaynaqları, demək olar ki, yoxdur. Abşeron yarımadasında isə tək təbii bulaq Buzovna qəsəbəsində, Əli ayağı məscidinin həyətindədir. Ümumiyyətlə, bu məsələdə Azərbaycanın vəziyyəti elə də əlverişli deyil, ölkənin su ehtiyatlarının yalnız 30 faizi ölkə daxilində formalaşır, suların 70 faizi isə ölkəyə kənardan daxil olur. Bakının su ilə təminatında da əsas yeri xaricdən qaynaqlanan Kür çayı tutur.

Bu quyuların bərpası həm də fors-major hallarında, müharibələrdə və digər fəlakətlərdə şəhər əhalisinin limitli olsa da içməli su ilə təmininə imkan yaradır. Yerli sakinlərin dediyinə görə, 1918-ci ilin mart qırğınları zamanı ermənilər Bakının bütün mərkəz hissəsini ələ keçirsələr də, İçərişəhərə girə bilməyiblər. Bu məsələdə əsas rolu İçərişəhərin yerli su qaynaqlarının olması oynayıb.

REAL TV-nin araşdırması göstərir ki, vaxtilə İçərişəhərin bütün su quyuları İçərişəhərə iki istiqamətdən daxil olan kəhriz-ovdan şəbəkəsindən qidalanıb. Bakı qalasına ən çox su indiki parlament binası tərəfindən gələn kəhriz sistemi ilə daxil olub və sular Şah ovdanında toplaşıb. Ümumiyyətlə, 1950-ci illərdə Bakının mərkəz hissəsində minə yaxın quyunun doldurulduğu ehtimal edilir.

Nyus.Az