Yəqin ki, Nyus.Az saytının çoxsaylı oxucuları o haqda xəbərdardırlar ki, 21 dekabr 2020-ci il tarixdə “Uzun illərdir ki, Binəqədidə on nəfərlik ailə elektrik enerjisinə həsrət qalıb- VİDEO/FAKT” başlıqlı açıqlama yayımlayıb, hər kəsin yaşananlarla bağlı məlumatlı olmasına səbəb olmuşduq. Açıqlamada yazıb qeyd etmişdik ki, Bakı şəhəri, Binəqədi rayonu, Xocasən kəndi, “Təkev” adı ilə tanınan ərazidə 25 ildən çox müddət ərzində yaşayan Həsənova Nazilə Şirməmməd qızıgilin ailəsində 10 nəfər olsa da, onlar bu gün də “Azərişıq” ASC-nin xətti ilə verilməli olan elektrik enerjisinə həsrət qalıblar. Qeyd edək ki, ailədə yaşayanların çoxu məktəbli olduqlarından onlar normal dərs də oxuya bilmirlər. İki oğul övladı SHXÇDX Nizami rayon idarəsindən hərbi xidmətə yola düşüb Vətən qarşısında müqəddəs borclarını şərəflə yerinə yetirən, övladlarından biri hərbi xidmətdə kəşfiyyatçı, digəri isə tankist olan Nazilə Həsənova, bu gün redaksiyamız vasitəsilə Azərbaycan Texniki Universitetinin İnzibati-təsərrüfat işləri üzrə prorektoru, dosent Abuzər Ağaverdi oğlu Mirzəliyevə, məhz ailə üzvləri adından minnətdarlıqlarını çatdırmağı xahiş edir. Nazilə xanım qeyd edir: “Biz olduqca maddi sıxıntılar içində yaşayan aztəminatlı ailələrdən biriyik. Bugünə kimi yaşadığımız evə “Azərişıq” ASC-nin xətti ilə elektrik enerjisi verilmədiyindən, Abuzər Mirzəliyev vəziyyətimizin çətinliyini hiss etdi. Yəni, o, yaxınlığımızda fəaliyyət göstərən müəssisəyə məxsus elektrik enerjisindən istifadə etməyimizə imkan yaratdı. Qeyd edim ki, Abuzər müəllim Azərbaycan Texniki Universitetinin İnzibati-təsərrüfat işləri üzrə prorektoru vəzifəsini daşımaqla bərabər, eyni zamanda o, bu gün həmin müəssisəyə də rəhbərlik edir. Əslində belə bir yanaşma onun insani münasibətindən, mənəvi saflığından xəbər verir. Bu gün biz Abuzər müəllimi bir xeyriyyəçi şəxs qismində qəbul edirik və hər birimiz ona hörmət və ehtiramımızı bildiririk. O, bizim ilin yağmurlu, küləkli, şaxtalı günlərində elektrik enerjisi ilə təmin olunmağımıza imkan yaratmaqla bərabər, eyni zamanda qəlbimizdə unudulmaz izlər də biuraxıb. Bütün bunlara baxmayaraq, bu gün istərdik ki, yaşadığımız evə “Azərişıq” ASC-nin xətti ilə elektrik xətti çəkilsin və elektrik enerjisinə olan ehtiyacımız ödənilsin. Son olaraq, bir daha Abuzər Mirzəliyevə öz minnətdarlığımızı bildirib, ona uzun ömür, cansağlığı arzulayırıq”.
Mirzə
